Schedule Update!

Dearest Teachers,

We're approaching the end of the year! Just to inform you of the remaining dates and activities in SBMA:

February 7 - SBMA Meeting 8

February 21 - SBMA Sportsfest

(Early AM - SBMA students, Late AM - Teachers and Volunteers)

March 07 - First Holy Communion and Graduation

Again, I want to thank you for your continued dedication and support in SBMA. Your generosity is much appreciated! The fruits of all our labor and efforts may not be apparent, but I am absolutely certain that our occasional interaction with these children from Pinaglabanan will touch their lives in some way. Maraming maraming salamat sa inyo! :) God bless you and your loved ones.

Cheers,

Francis

SBMA #8 Workplan

WORKPLAN: 07 Pebrero 2010

Ebanghelyo

Lukas 5:1-11

Nangyari nga, habang nagkakatipun-tipon ang mga tao kay Jesus upang makinig ng salita ng Diyos, siya ay nakatayo sa tabi ng lawa ng Genesaret. Nakakita siya ng dalawang bangka na nasa tabi ng lawa. Ang mga mangingisda ay nakababa na sa bangka at naghuhugas ng mga lambat. Sumakay siya sa isa sa mga bangka na pag-aari ni Simon. Ipinakiusap niya kay Simon na ilayo ng kaunti sa baybayin ang bangka. Pagkaupo niya, siya ay nagturo sa mga tao mula sa bangka.

Pagkatapos niyang magsalita, nagsabi siya kay Simon: Pumalaot kayo. Ihulog ninyo ang mga lambat upang makahuli ng mga isda.

Sumagot si Simon na sinabi: Guro, magdamag kaming nagpagal at wala kaming nahuli. Gayunman kahit wala kaming nahuli, sa iyong salita ay ihuhulog ko ang lambat.

Pagkagawa nila ng gayon, nakahuli sila ng napakaraming isda at ang lambat ay napupunit. Kinawayan nila ang kanilang kapwa mangingisda na nasa ibang bangka upang lumapit at tulungan sila. Lumapit sila at pinuno ang dalawang bangka kaya sila ay papalubog.

Nang makita iyon ni Simon Pedro, nagpatirapa siya sa mga tuhod ni Jesus. Sinabi niya: Panginoon, lumayo ka sa akin sapagkat ako ay isang taong makasalanan. Sinabi niya ito sapagkat siya ay namangha, gayundin ang kaniyang mga kasamahan dahil sa napakaraming huli. Namangha rin ang mga anak ni Zebedeo na sina Santiago at Juan, na mga katuwang ni Simon. Sinabi ni Jesus kay Simon: Huwag kang matakot. Mula ngayon ay mamalakaya ka na ng tao. Pagkadaong nila ng mga bangka, iniwan nila ang lahat at sumunod kay Jesus.

Mga tanong:

- Sinu-sino ang mga unang alagad na tinawag ni Jesus?

- Ano ang nais ipagawa ni Jesus sa kanila?

- Ano ang kanilang tugon kay Jesus?

GRADES 1 and 2

PAGPAPAHALAGA (value)

- Pagsunod, Pagtalima, Paggalang, Pagtupad, Pakikinig, Pagmamahal

ACTIVITY

Laruin ang “Following the Leader” – Ang guro ay maaaring magsagawa ng mga kilos na dapat gayahin ng mga bata.

PAGUUGNAY (exposition)

Bigyang halaga ang pakikinig at pagsunod. Dapat ay sundin natin ang mga taong nagbibigay ng mabuting halimbawa at hindi ang masasama. Ang pagmamahal din ni Jesus ay dapat nating tularan.

TUGON (response)

Inaanyayahan ni Hesus na tayo’y maging masunurin. Paano natin maipapakita ito sa ating mga magulang, kapatid, kamag-anak, guro at kalaro sa araw-araw?

GRADES 3A, 4, 5, 6 at HIGH SCHOOL

PAGPAPAHALAGA (value)

- Pagsunod, Pagtalima, Paggalang, Pagtupad, Pakikinig, Pagmamahal

MOTIBASYON (motivation)

(Teacher’s Prerogative)

SITWASYON NG BUHAY (context)

Maaaring pagpilian tapos talakayin:

1) Pagtupad sa mga tungkulin sa bahay o sa paaralan

2) Makikinig ng mabuti sa mga itinuturo ng guro sa paaralan

3) Susundin ang mga payo ng mga magulang nang may pagmamahal at paggalang

PAGUUGNAY (exposition)

Hindi sapat ang gawin lamang natin ang mga bagay na makabubuti para sa ating sarili. May mga tungkulin din tayong dapat gampanan para sa ating kapwa upang tayo ay mabuhay ng maayos, mabuti at masayang kasama nila. Ipagmamalaki tayo ng ating mga magulang, kapatid, guro at mga kaibigan kapag natupad natin ang mga tungkuling nakalaan sa atin.

Sa Linggong ito, mapakikinggan natin kung paano tinawag ni Jesus ang mga taong pinili niyang makasama sa misyong iniaatas ng Ama sa kanya. Alamin natin kung paano tumugon at sumunod ang mga taong tinawag niya sa gawaing nakalaan sa kanila.

TUGON (response)

Maituturing ko ba ang aking sarili na kaibigan ni Jesus?

Paano ko maisasabuhay ang mga narinig kong turo ni Jesus?

SBMA #7 Workplan

WORKPLAN

Gospel for 24 January 2010
Lukas 1:1-4, 4:14-15, 19

Kagalang-galang na Teofilo: Marami na po ang nagsikap na sumulat tungkol sa mga bagay na naganap sa gitna namin. Ang kanilang sinulat ay ayon sa sinabi sa amin ng mga nakasaksi nito buhat sa pasimula at nangaral ng Salita. Matapos na ako’y makapagsuri nang buong ingat tungkol sa lahat ng bagay na ito buhat pa sa pasimula, minabuti ko pong sumulat ng isang maayos na salaysay para sa inyo upang lubusan ninyong matiyak ang katotohanan ng mga bagay na itinuro sa inyo.

Bumalik si Hesus sa Galilea at sumakanya ang kapangyarihan ng Espiritu Santo. Kumalat sa palibot na lupain ang balita tungkol sa kanya. Nagturo siya sa kanilang mga sinagoga, at di-nakila siya ng lahat.

“Sumasaakin ang Espiritu ng Panginoon, sapagkat hinirang niya ako upang ipangaral sa mga dukha ang Mabuting Balita. Sinugo niya ako upang ipahayag sa mga bihag na sila’y lalaya. At sa mga bulag na sila’y makakikita, upang bigyang-kaluwagan ang mga sinisiil, at ipahayag ang pagliligtas na gagawin ng Panginoon.” Nilulon niya ang kasulatan, at matapos isauli sa tagapaglingkod, siya’y naupo. Nakatitig sa kanya ang lahat ng nasa sinagoga. At sinabi niya sa kanila: “Natupad ngayon ang bahaging ito ng Kasulatan samantalang nakikinig kayo.”

GRADES 1 and 2

HALAGA (value)

- Pagtanggap, Pagsunod, Pakikinig, Tibay ng Loob

ACTIVITY

Laruin ang “Simon Says” at “Give Me”

PAGUUGNAY

Bigyang halaga ang pakikinig at pagsunod. Alamin ang mga naging problema tuwing di nakikinig. At ano naman ang maganda sa pakikinig?

TUGON

Inaanyayahan ni Hesus na tayo’y maging masunurin. Paano natin maipapakita ito sa ating mga magulang, kapatid, kamag-anak, guro at kalaro sa araw-araw?

GRADES 3A, 4, 5, 6 at HIGH SCHOOL

HALAGA (value)

- Pagtanggap, Pagsunod, Pakikinig, Tibay ng Loob

MOTIBASYON (motivation)

(Teacher’s Prerogative)

SITWASYON NG BUHAY

Maaaring pagpilian tapos talakayin:

1) Maganda at may pagkakasundo ang pagsasamahan ng barkada at grupo kung marunong sumunod at tumupad ang bawat sakop sa layunin at tungkulin nito.

2) Nangakong gagawin ang mga tungkulin sa loob ng bahay bago maglaro pero kinakalimutan.

3) Nakikinig sa payo ng guro ngunit hindi tinupad.

PAGUUGNAY

May kasabihan na habang nabubuhay ang tao may pagkakataon mapaunlad ang ating sarili. Magiging maganda ang kinabukasan kung buong tapang nating tutuparin at gagampanan ang mga tungkuling iniatas sa atin araw-araw sa loob ng bahay o sa paaralan o sa pamayanan.

Sa ebanghelyo sa Linggong ito maririnig natin si Hesus na ipinahahayag ang Mabuting balita sa mga dukha, mga bulag at mga inuusig. Sa kanyang pangangaral pinaaalalahanan niya ang lahat na huwag lamang makinig bagkus tanggapin at isabuhay ang Mabuting Balita upang makamit ang pangakong kaligtasan para sa lahat. Pakinggan nating panawag ni Hesus sa atin.

TUGON

Paano ko tutugunan ang hamon ni Hesus na maging “Mabuting Balita” sa aking mga magulang, kapatid, kamag-anak, guro at kalaro sa araw-araw?